መጽሐፈ ኩፋሌ 10

10 1 ወበሱባዔ ፡ ሣልስ ፡ ዘኢዮቤልዉ ፡ ዝንቱ ፡ አኀዙ ፡ አጋንንት ፡ ርኩሳን ፡ ያስሕትዎሙ ፡ ለደቂቀ ፡ ውሉደ ፡ ኖኅ ፡ ወያዕብድዎሙ ፡ ወያሕጕልዎሙ ። 2 ወመጽኡ ፡ ውሉደ ፡ ኖኅ ፡ ኀበ ፡ ኖኅ ፡ አቡሆሙ ፡ ወነገርዎ ፡ በእንተ ፡ አጋንንት ፡ እለ ፡ ያስሕቱ ፡ ወይጼልሉ ፡ ወይቀትሉ ፡ ውሉደ ፡ ውሉዱ ። 3 ወጸለየ ፡ ቅድመ ፡ እግዚአብሔር ፡ አምላኩ ፡ ወይቤ ፡ አምላከ ፡ መናፍስት ፡ ዘውስተ ፡ ኵሉ ፡ ዘሥጋ ፡ ዘገበርከ ፡ ምስሌየ ፡ ምሕረተ ፡ ወአድኀንከኒ ፡ ወውሉድየሂ ፡ እምነ ፡ ማየ ፡ አይኅ ፡ ወኢገበርከኒ ፡ ከመ ፡ እኅለቅ ፡ ከመ ፡ ገበርከ ፡ ለውሉደ ፡ ሐጉል ፡ እስመ ፡ ዐቢይ ፡ ሣህልከ ፡ ላዕሌየ ፡ ወዐብየት ፡ ምሕረትከ ፡ ላዕለ ፡ ነፍስየ ። ይትለዐል ፡ ሣህልከ ፡ ላዕለ ፡ ውሉደ ፡ ውሉድከ ። ወኢይመብሉ ፡ መናፍስት ፡ እኩያን ፡ ላዕሌሆሙ ፡ ከመ ፡ ኢያማስንዎሙ ፡ እምነ ፡ ምድር ። 4 ወአንተ ፡ ባርከኒ ፡ ኪያየ ፡ ወውሉድየ ፡ ንልሀቅ ፡ ወንብዛኅ ፡ ወንምልኣ ፡ ለምድር ። 5 ወአንተ ፡ ታአምር ፡ ዘከመ ፡ ገብሩ ፡ ትጉሃኒከ ፡ አበዊሆሙ ፡ ለእሉ ፡ መንፈስ ፡ በመዋዕልየ ። ወዝኒ ፡ መናፍስት ፡ እለ ፡ ሀለዉ ፡ በሕይወት ፡ ዕጽዎሙ ፡ ወአኀዞሙ ፡ ውስተ ፡ መካነ ፡ ደይን ፡ ወኢያማስኑ ፡ ውስተ ፡ ውሉደ ፡ ገብርከ ፡ አምላኪየ ፡ እስመ ፡ ፀዋጋን ፡ እሙንቱ ፡ ወለአማስኖ ፡ ተፈጥሩ ፡ 6 ወኢይመብሉ ፡ በመንፈሰ ፡ ሕያዋን ፡ እስመ ፡ አንተ ፡ ባሕቲትከ ፡ ታአምር ፡ ኵነኔሆሙ ፡ ወኢይትባውሑ ፡ ላዕለ ፡ ውሉደ ፡ ጻድቃን ፡ እምይእዜ ፡ ወእስከ ፡ ለዓለም ። 7 ወይቤለነ ፡ አምላክነ ፡ ከመ ፡ ንእስር ፡ ኵሎ ። 8 ወመጽአ ፡ መልአከ ፡ መናፍስት ፡ መስቴማ ፡ ወይቤ ፡ እግዚአኦ ፡ ፈጣሪ ፡ አትርፍ ፡ እምኔሆሙ ፡ ቅድሜየ ፡ ወይስምዑ ፡ ቃልየ ፡ ወይግበሩ ፡ ኵሎ ፡ ዘእቤሎሙ ፡ እስመ ፡ እመ ፡ ኢተርፉ ፡ ሊተ ፡ እምውስቴቶሙ ፡ ኢይክል ፡ ገቢረ ፡ ስልጣነ ፡ ፈቃድየ ፡ ውስተ ፡ ውሉደ ፡ ሰብእ ። እስመ ፡ እሙንቱ ፡ ውእቶሙ ፡ ለአማስኖ ፡ ወለአስሕቶ ፡ ቅድመ ፡ ኵነኔየ ፡ እስመ ፡ ዐቢይ ፡ እከዮሙ ፡ ለውሉደ ፡ ሰብእ ። 9 ወይቤ ፡ ይትረፉ ፡ ቅድሜሁ ፡ ዐሥራቶሙ ፡ ወተስዓተ ፡ መክፈልተ ፡ ያውርድ ፡ ውስተ ፡ መካነ ፡ ደይን ፡ 10 ወለአሐዱ ፡ እምኔነ ፡ ይቤ ፡ ከመ ፡ ንምሀሮ ፡ ለኖኅ ፡ ኵሎ ፡ ፈውሶሙ ፡ እስመ ፡ ያአምር ፡ ከመ ፡ አኮ ፡ በርትዕ ፡ ዘየሐውሩ ፡ ወአኮ ፡ በጽድቅ ፡ ዘይትባአሱ ። 11 ወገበርነ ፡ በከመ ፡ ኵሉ ፡ ቃሉ ፡ ወኵሎ ፡ እኩያነ ፡ እለ ፡ ይጸውጉ ፡ አሰርነ ፡ ውስተ ፡ መካነ ፡ ደይን ፡ ወዐሥራቶሙ ፡ አትረፍነ ፡ ከመ ፡ ይኰንኑ ፡ ቅድመ ፡ ሰይጣን ፡ ዲበ ፡ ምድር ። 12 ወፈውሰ ፡ ደዌሆሙ ፡ ኵሎ ፡ ነገርናሁ ፡ ለኖኅ ፡ ምስለ ፡ አስሕቶቶሙ ፡ ከመ ፡ ይፈውስ ፡ በዕፀ ፡ ምድር ። 13 ወጸሐፈ ፡ ኖኅ ፡ ኵሎ ፡ ዘከመ ፡ መሀርናሁ ፡ በመጽሐፍ ፡ በኵሉ ፡ ትዝምደ ፡ ፈውስ ፡ ወተዐፅዉ ፡ መናፍስት ፡ እኩያን ፡ እምድኅሬሆሙ ፡ ለውሉደ ፡ ኖኅ ፡ 14 ወወሀበ ፡ ኵሎ ፡ መጻሕፍተ ፡ ዘጸሐፈ ፡ ለሴም ፡ ወልዱ ፡ ዘይልህቅ ፡ እስመ ፡ ኪያሁ ፡ ያፈቅር ፡ ፈድፋደ ፡ እምኵሉ ፡ ውሉዱ ። 15 ወኖመ ፡ ኖኅ ፡ ምስለ ፡ አበዊሁ ፡ ወተቀብረ ፡ ውስተ ፡ ሉባር ፡ ደብር ፡ በምድረ ፡ አራራት ፡ 16 ተስዓተ ፡ ምእተ ፡ ወኀምሳ ፡ ዓመተ ፡ ፈጸመ ፡ በሕይወቱ ፡ ዐሠርተ ፡ ወተስዓተ ፡ ኢዮቤልዉ ፡ ወክልኤ ፡ ሱባዔ ። ወኀምስተ ፡ ዓመተ ፡ 17 ዘአፈድፈደ ፡ ሐዪወ ፡ ዲበ ፡ ምድር ፡ እምውሉደ ፡ ሰብእ ፡ በእንተ ፡ ጽድቁ ፡ ዘባቲ ፡ ፍጹም ፡ በጽድቁ ፡ ዘእንበለ ፡ ኤኖክ ። እስመ ፡ ግብሩ ፡ ለሄኖክ ፡ ፍጥረት ፡ ውእቱ ፡ ለስምዕ ፡ ለትዝምደ ፡ ዓለም ፡ ከመ ፡ ይንግር ፡ ኵሎ ፡ ግብረ ፡ ለትውልደ ፡ ትውልድ ፡ በዕለተ ፡ ደይን ። 18 ወበሠላሳ ፡ ወሠለስቱ ፡ ኢዮቤልዉ ፡ በዓመት ፡ አሐዱ ፡ በዝ ፡ ካልእ ፡ ሱባዔ ፡ ነሥአ ፡ ሎቱ ፡ ፋሌክ ፡ ብእሲተ ፡ እንተ ፡ ስማ ፡ ሎምና ፡ ወለተ ፡ ሲናኦር ፡ ወወለደት ፡ ሎቱ ፡ ወልደ ፡ በዓመት ፡ ራብዕ ፡ ዘሱባዔ ፡ ዝንቱ ፡ ወጸውዐ ፡ ስሞ ፡ ራግው ፡ እስመ ፡ ይቤ ፡ ናሁ ፡ ውሉደ ፡ ሰብእ ፡ ኮኑ ፡ እኩያነ ፡ ለምክረ ፡ ፁግ ፡ ከመ ፡ ይሕንጹ ፡ ሎሙ ፡ ሀገረ ፡ ወማኅፈደ ፡ ውስተ ፡ ምድረ ፡ ሰኖኦር ፡ 19 እስመ ፡ ፈለሱ ፡ እምድረ ፡ አራራት ፡ መንገለ ፡ ጽባሕ ፡ ውስተ ፡ ሰናኦር ፡ እስመ ፡ በመዋዕሊሁ ፡ ሐነጽዎ ፡ ለሀገር ፡ ወለማኅፈድ ፡ እንዘ ፡ ይብሉ ፡ ንዕርግ ፡ ቦቱ ፡ ውስተ ፡ ሰማይ ፡ 20 ወአኀዙ ፡ ይሕንጹ ፡ ወበሱባዔ ፡ ራብዕ ፡ ወፈጡ ፡ በእሳት ፡ ወኮኖሙ ፡ ግንፋል ፡ ከመ ፡ እብን ፡ ወፅቡር ፡ በዘ ፡ ይመርዩ ፡ ቦቱ ፡ አስፋሊጦስ ፡ ዘይወፅእ ፡ እምነ ፡ ባሕር ፡ ወእምአንቅዕተ ፡ ማያት ፡ በምድረ ፡ ሰናኦር ፡ 21 ወሐነጽዎ ፡ አርብዓ ፡ ዓመተ ፡ ወሠለስተ ፡ ዓመተ ፡ ሀለዉ ፡ የሐንጽዎ ፡ ግንፋለ ፡ ፍጹመ ፡ ሠለስተ ፡ ወዐሠርተ ፡ ውስቴቱ ፡ ወሣልስተ ፡ አሐቲ ፡ ለኑኁ ፡ ኀምሳ ፡ ምእት ፡ ወአርባዕቱ ፡ ምእት ፡ ወሠላሳ ፡ ወሠላስ ፡ በእመት ፡ ዐርገ ፡ ኑኁ ። ወክልኤ ፡ ስዝር ፡ ወዐሠርቱ ፡ ምዕራፍ ። 22 ወይቤለነ ፡ እግዚአብሔር ፡ አምላክነ ፡ ለነ ፡ ናሁ ፡ ሕዝብ ፡ አሐዱ ፡ ወወጠነ ፡ ይግበር ፡ ወይእዜኒ ፡ ኢየሐልቅ ፡ እምኔሆሙ ። ንዑ ፡ ንረድ ፡ ወንክዐው ፡ ልሳናቲሆሙ ፡ ወኢይስማዕ ፡ አሐዱ ፡ ካልኦ ። ወይዘረዉ ፡ ውስተ ፡ አህጉር ፡ ወውስተ ፡ አሕዛብ ፡ ወኢትንበር ፡ እንከ ፡ አሐቲ ፡ ምክር ፡ ላዕሌሆሙ ፡ እስከ ፡ አመ ፡ ዕለተ ፡ ደይን ፡ 23 ወወረደ ፡ እግዚአብሔር ፡ ወወረድነ ፡ ምስሌሁ ፡ ንርአይ ፡ ሀገረ ፡ ወማኅፈደ ፡ ዘሐነጹ ፡ ውሉደ ፡ ሰብእ ። 24 ወሦጠ ፡ ኵሎ ፡ ቃለ ፡ ልሳናቲሆሙ ፡ ወኢሰምዐ ፡ እንከ ፡ አሐዱ ፡ ቃለ ፡ ካልኡ ፡ ወአንተጉ ፡ እንከ ፡ ሐኒጸ ፡ ሀገር ፡ ወማኅፈድ ። 25 በእንተዝ ፡ ተሰምየት ፡ ኵላ ፡ ምድረ ፡ ሰናኦር ፡ ባቤል ፡ እስመ ፡ በህየ ፡ ሦጠ ፡ አምላክ ፡ ኵሎ ፡ ልሳናቲሆሙ ፡ ለውሉደ ፡ ሰብእ ። ወእምህየ ፡ ተዘርዉ ፡ ውስተ ፡ አህጉሪሆሙ ፡ በበ ፡ ልሳናቲሆሙ ፡ ወበበ ፡ ሕዘቢሆሙ ፡ 26 ወፈነወ ፡ እግዚአብሔር ፡ ነፋሰ ፡ ውስተ ፡ ማኅፈደ ፡ ወገፍትኦ ፡ ውስተ ፡ ምድር ። ወናሁ ፡ ውእቱ ፡ ማእከለ ፡ አሱር ፡ ወባቢሎን ፡ ውስተ ፡ ምድረ ፡ ሰናኦር ፡ ወጸውዐ ፡ ሰሞ ፡ ድቀት ። 27 በሱባዔ ፡ ራብዕ ፡ በአሐዱ ፡ ዓመት ፡ በቅድመ ፡ ዚአሁ ፡ ዘሠላሳ ፡ ወአርባዕቱ ፡ ኢዮቤልዉ ፡ ተዘርዉ ፡ እምድረ ፡ ሰናኦር ። 28 ወሖሩ ፡ ካም ፡ ወውሉዱ ፡ ውስተ ፡ ምድር ፡ እንተ ፡ እኅዝት ፡ ሎቱ ፡ ዘረከበ ፡ በመክፈልቱ ፡ ውስተ ፡ ምድረ ፡ ደቡብ ፡ 29 ወርእየ ፡ ከናአን ፡ ምድረ ፡ ሊባኖስ ፡ እስከ ፡ ሙሐዘ ፡ ግብጽ ፡ ከመ ፡ ሠናይት ፡ ይእቲ ፡ ጥቀ ። ወኢሖረ ፡ ውስተ ፡ ምድረ ፡ ርስቱ ፡ መንገለ ፡ ዐረበ ፡ ባሕር ፡ ወኀደረ ፡ ውስተ ፡ ምድረ ፡ ሊባኖስ ፡ እምጽባሕ ፡ ወእምዐረብ ፡ እምእደ ፡ ሊባኖስ ፡ ወበእደ ፡ ባሕር ። 30 ወይቤሎ ፡ ካም ፡ አቡሁ ፡ ወኵስ ፡ ወመጽሬም ፡ አኃዊሁ ፡ እስመ ፡ ኀደርከ ፡ ውስተ ፡ ምድር ፡ እንተ ፡ ኢኮነት ፡ እንቲአከ ፡ ወኢወፅአ ፡ ለነ ፡ በዕፀው ፡ ኢትግበር ፡ ከመዝ ። እስመ ፡ ለእመ ፡ ከመዝ ፡ ገበርከ ፡ አንተሂ ፡ ወደቂቅከሂ ፡ ትወድቁ ፡ ውስተ ፡ ምድር ፡ ወርጉማን ፡ በሀከክ ፡ እስመ ፡ በሀከክ ፡ ኀደርክሙ ፡ ወበሀከክ ፡ ይወድቁ ፡ ደቂቅከ ፡ ወትሤሮ ፡ ለዓለም ፡ 31 ኢትኅድር ፡ ውስተ ፡ ማኅደረ ፡ ሴም ። እስመ ፡ ለሴም ፡ ወለውሉዱ ፡ ወፅአ ፡ በዕፆሙ ፡ 32 ርጉም ፡ አንተ ፡ ወርጉመ ፡ ትከውን ፡ እምኵሎሙ ፡ ውሉደ ፡ ኖኅ ፡ በመርገም ፡ እንተ ፡ ተሠራዕነ ፡ በመሐላ ፡ በቅድሜሁ ፡ ለመኰንን ፡ ቅዱስ ፡ ወበቅድመ ፡ ኖኅ ፡ አቡነ ። 33 ወኢሰምዖሙ ፡ ወኀደረ ፡ ምድረ ፡ ሊባኖስ ፡ እምኤማት ፡ እስከ ፡ ምብዋአ ፡ ግብጽ ፡ ውእቱ ፡ ወውሉዱ ፡ እስከ ፡ ዛቲ ፡ ዕለት ፡ 34 ወበእንተዝ ፡ ተሰምየት ፡ ይእቲ ፡ ምድር ፡ ምድረ ፡ ከናአን ። 35 ወያፌትሰ ፡ ወውሉዱ ፡ ሖሩ ፡ መንገለ ፡ ባሕር ፡ ወኀደሩ ፡ ውስተ ፡ ምድረ ፡ መክፈልቶሙ ፡ ወርእየ ፡ ማዳይ ፡ ምድረ ፡ ባሕር ፡ ወኢአደመቶ ፡ በቅድሜሁ ፡ ወአስተብቍዐ ፡ እምኀበ ፡ ኤላም ፡ ወአሱር ፡ ወአርፋክስድ ፡ እምኀበ ፡ እኀወ ፡ ብእሲቱ ፡ ወኀደረ ፡ ውስተ ፡ ምድረ ፡ ሜድቂን ፡ ቅሩበ ፡ ኀበ ፡ እኅወ ፡ ብእሲቱ ፡ እስከ ፡ ዛቲ ፡ ዕለት ፡ 36 ወሰመየ ፡ ምንባሪሁ ፡ ወምንባረ ፡ ውሉደ ፡ ሜዲቂን ፡ በስመ ፡ ማዳይ ፡ አቡሆሙ ።