ዘዮናስ ነቢይ 1

ዘዮናስ ፡ ነቢይ ። ወኮነ ፡ ቃለ ፡ እግዚአብሔር ፡ ኀበ ፡ ዮናስ ፡ ወልደ ፡ አማቴ ፡ ወይቤሎ ፡ እግዚአብሔር ፡ ለዮናስ ። ተንሥእ ፡ ወሖር ፡ ነኔዌ ፡ ሀገረ ፡ ዐባየ ፡ ወስብክ ፡ ሎሙ ፤ እስመ ፡ ዐርገ ፡ ገዐረ ፡ እከዮሙ ፡ ኀቤየ ። ወሖረ ፡ ዮናስ ፡ ወተኀጥአ ፡ ብሔረ ፡ ተርሴስ ፡ እምገጸ ፡ እግዚአብሔር ፤ ወወረደ ፡ ሀገረ ፡ ኢዮጴ ፡ ወረከበ ፡ ሐመረ ፡ ዘይነግድ ፡ ብሔረ ፡ ተርሴስ ፤ ወተዐሰበ ፡ ወዐርገ ፡ ውስቴቱ ፡ ይንግድ ፡ ምስሌሆሙ ፡ ተርሴስ ፡ እምገጸ ፡ እግዚአብሒር ። ወአምጽአ ፡ እግዚአብሔር ፡ ነፋሰ ፡ ዐቢየ ፡ ውስተ ፡ ባሕር ፡ ወዐቢየ ፡ ማዕበለ ፡ ባሕር ፤ ወተመንደበ ፡ ሐመሮሙ ፡ ከመ ፡ ይሰበር ። ወፈርሁ ፡ ኖትያት ፡ ወአውየዉ ፡ ኵሎሙ ፡ ኀበ ፡ አማልክቲሆሙ ፤ ወአስተዋፅኡ ፡ ወገደፉ ፡ ውስተ ፡ ባሕር ፡ ንዋዮሙ ፡ ከመ ፡ ያቅልሉ ፡ ሐመሮሙ ፤ ወወረደ ፡ ዮናስ ፡ ውስተ ፡ ከርሠ ፡ ሐመር ፡ ወኖመ ፡ ወንኅረ ። ወወረደ ፡ ኀቤሁ ፡ ዘሐደፍ ፡ ወይቤሎ ፤ ምንት ፡ ያነውመከ ፤ ተንሥእ ፡ ወጸውዕ ፡ አምላከከ ፡ ከመ ፡ ያድኅነነ ፡ እግዚአብሔር ፡ ወኢንሙት ። ወተባሀሉ ፡ በበይናቲሆሙ ፤ ንዑ ፡ ንትዓፀው ፡ ወናአምር ፡ በበይነ ፡ መኑ ፡ ረከበተነ ፡ ዛቲ ፡ እኪት ፤ ወተዓፀዉ ፡ ወወረደ ፡ ዕፅ ፡ ላዕለ ፡ ዮናስ ። ወይቤልዎ ፤ ንግረነ ፡ በበይነ ፡ መኑ ፡ ረከበተነ ፡ ዛቲ ፡ እኪት ፤ ምንት ፡ ተግባርከ ፡ ወእምአይቴ ፡ መጻእከ ፡ ወአይቴ ፡ ተሐውር ፡ ወአይቴ ፡ ብሔርከ ፡ ወምንት ፡ ሕዝብከ ። ወይቤሎሙ ፡ ዮናስ ፤ ገብረ ፡ እግዚአብሒር ፡ አነ ፡ ወአምላኪየ ፡ እግዚአብሑር ፡ አምላከ ፡ ሰማይ ፡ ዘገብረ ፡ ባሕረ ፡ ወየብሰ ። ወፈርሁ ፡ እሙንቱ ፡ ዕደው ፡ ዐቢየ ፡ ፍርሀተ ፡ ወይቤልዎ ፤ ምንተ ፡ ገበርከ ፤ ወአእመርዎ ፡ እሙንቱ ፡ ዕደው ፡ ከመ ፡ እምገጸ ፡ እግዚአብሔር ፡ ተኀጥአ ፡ እስመ ፡ ነገሮሙ ። ወይቤልዎ ፤ ምንተ ፡ እንከ ፡ ንረሲከ ፡ ወይኅድገነ ፡ ባሕር ፤ እስመ ፡ ይትሀወክ ፡ ባሕር ፡ ወይትነሣእ ፡ ማዕበል ፡ ዐቢይ ። ወይቤሎሙ ፡ ዮናስ ፤ ንሥኡኒ ፡ ወወርዉኒ ፡ ውስተ ፡ ባሕር ፡ ወየኀድገክሙ ፡ ባሕር ፤ አነ ፡ አእመርኩ ፡ ከመ ፡ በእንቲአየ ፡ መጽአክሙ ፡ ዝንቱ ፡ ማዕበል ፡ ዐቢይ ። ወተባአሱ ፡ ይትመየጡ ፡ መንገለ ፡ ምድር ፡ እሙንቱ ፡ ዕደው ፡ ወስእኑ ፤ እስመ ፡ ትትሀወክ ፡ ባሕር ፡ ወትትነሣእ ፡ ማዕበል ፡ ላዕሌሆሙ ። ወአውየዉ ፡ ኵሎሙ ፡ ኅቡረ ፡ ኀበ ፡ እግዚአብሔር ፡ ወይቤሉ ፤ ሓሰ ፡ ለከ ፡ እግዚኦ ፡ ኢታጥፍአነ ፡ በበይነ ፡ ነፍሱ ፡ ለዝንቱ ፡ ብእሲ ፡ ወኢትረሲ ፡ ላዕሌነ ፡ ደመ ፡ ጻድቅ ፤ እስመ ፡ አንተ ፡ አግዚኦ ፡ ዘከመ ፡ ፈቀድከ ፡ ገበርከ ። ወነሥእዎ ፡ ለዮናስ ፡ ወወረውዎ ፡ ውስተ ፡ ባሕር ፡ ወአርመመት ፡ ባሕር ። ወፈርህዎ ፡ ለእግዚአብሔር ፡ እሙንቱ ፡ ዕደው ፡ ዐቢየ ፡ ፍርሀተ ፡ ወሦዑ ፡ ለእግዚአብሔር ፡ መሥዋዕተ ፡ ወበፅዑ ፡ ብፅዓተ ።