መጽሐፈ ሄኖክ 78

አስማቱ ፡ ለፀሐይ ፡ ከመዝ ፡ ፩ኦርያሬስ ፡ ወካልኡ ፡ ቶማስ ። ወለወርኅ ፡ ፬አስማት ፡ ቦቱ ፡ ፩ስሙ ፡ አሶንያ ፡ ወካልእ ፡ እብላ ፡ ወሣልስ ፡ ብናሴ ፡ ወራብዕ ፡ ኤራዕ ። እሉ ፡ እሙንቱ ፡ ፪ብርሃናት ፡ ዐበይት ፡ ክበቦሙ ፡ ከመ ፡ ክበበ ፡ ሰማይ ፡ ወአምጣኒሆሙ ፡ ለክልኤሆሙ ፡ ዕሩያን ። በክበበ ፡ ፀሐይ ፡ ፯ክፍለ ፡ ብርሃን ፡ ዘይትዌሰክ ፡ ቦቱ ፡ እምወርኅ ፡ ወበመስፈርት ፡ ትትወደይ ፡ እስከ ፡ የኀልፍ ፡ ሳብዕ ፡ ክፍለ ፡ ፀሐይ ። ወየዐርቡ ፡ ወይበውኡ ፡ ውስተ ፡ ኀዋኅው ፡ ምዕራብ ፡ ወየዐውዱ ፡ እንተ ፡ መስዕ ፡ ወእንተ ፡ ኀዋኅው ፡ ምሥራቅ ፡ ይወጽኡ ፡ ዲበ ፡ ገጸ ፡ ሰማይ ። ወሶበ ፡ ይትነሣእ ፡ ወርኅ ፡ ያስተርኢ ፡ በሰማይ ፡ ወመንፈቀ ፡ ሳብዕ ፡ እደ ፡ ብርሃን ፡ ይከውን ፡ ቦቱ ፡ ወበዐሡር ፡ ወረቡዕ ፡ ይፌጽም ፡ ኵሎ ፡ ብርሃኖ ። ወ፫ትኅምስተ ፡ ብርሃን ፡ ይትወደይ ፡ ውስቴታ ፡ እስከ ፡ ዐሡር ፡ ወኃምስ ፡ ይትፌጸም ፡ ብርሃነ ፡ ዚአሁ ፡ ለትእምርተ ፡ ዓመት ፡ ወይከውን ፡ ፫ትኅምስተ ፡ ወይከውን ፡ ወርኅ ፡ በመንፈቀ ፡ ሳብዕት ፡ እድ ። ወበሕፀፀ ፡ ዚአሁ ፡ በቀዳሚት ፡ ዕለት ፡ የሐፅፅ ፡ ፲ወ፬እደ ፡ ብርሃነ ፡ ዚአሁ ፡ ወበሳኒታ ፡ የሐፅፅ ፡ ፲ወ፫እደ ፡ ወበሣልስ ፡ የሐፅፅ ፡ ፲ወ፪እደ ፡ ወበራብዕ ፡ የሐፅፅ ፡ ፲ወ፩ክፍለ ፡ ወበኃምስ ፡ የሐፅፅ ፡ ፲ክፍለ ፡ ወበሳድስ ፡ የሐፅፅ ፡ ፱ክፍለ ፡ ወበሳብዕ ፡ የሐፅፅ ፡ ፰ክፍለ ፡ ወበሳምን ፡ የሐፅፅ ፡ ፯ክፍለ ፡ ወበታስዕ ፡ የሐፅፅ ፡ ፮ክፍለ ፡ ወበዓሥር ፡ የሐፅፅ ፡ ፭ክፍለ ፡ ወበ ፡ ፲ወ፩የሐፅፅ ፡ ፬ክፍለ ፡ ወበ ፡ ፲ወ፪የሐፅፅ ፡ ፫ክፍለ ፡ ወበ ፡ ፲ወ፫የሐፅፅ ፡ ፪ወበ ፡ ፲ወ፬የሐፅፅ ፡ መንፈቀ ፡ ፯እድ ፡ ወኵሉ ፡ ብርሃኑ ፡ በ፲ወ፭ዕለት ፡ ይትዌዳዕ ፡ ዘተርፈ ፡ እምኵሉ ። ወበአውራኅ ፡ እሙራት ፡ ይከውን ፡ በበ ፡ ፳ወ፱መዋዕል ፡ ለወርኅ ፡ ወቦ ፡ ጊዜ ፡ ፳ወ፰ ። ወካልእተ ፡ ሥርዐተ ፡ አርአየኒ ፡ ኡርኤል ፡ ሶበ ፡ ይትወደይ ፡ ብርሃን ፡ ውስተ ፡ ወርኅ ፡ ወእምኀበ ፡ ይትወደይ ፡ እምፀሐይ ። ኵሎ ፡ ዘመነ ፡ ዘተሐውር ፡ ወርኅ ፡ በብርሃነ ፡ ዚአሃ ፡ ትወዲ ፡ በቅድመ ፡ ፀሐይ ፡ እስከ ፡ ፲ወ፬መዋዕል ፡ ይትፌጸም ፡ ብርሃና ፡ ውስተ ፡ ሰማይ ፡ ወሶበ ፡ ይውዒ ፡ ኵሉ ፡ ይትፌጸም ፡ ብርሃኑ ፡ ውስተ ፡ ሰማይ ። ወቀዳሚት ፡ ዕለት ፡ ሠርቀ ፡ ትሰመይ ፡ እስመ ፡ በይእቲ ፡ ዕለት ፡ ይትነሣእ ፡ ላዕሌሃ ፡ ብርሃን ። ወይትፌጸም ፡ ጥንቁቀ ፡ በዕለተ ፡ ይወርድ ፡ ፀሐይ ፡ ውስተ ፡ ዓረብ ፡ ወእምነ ፡ ምሥራቅ ፡ የዐርግ ፡ በሌሊት ፡ ወያበርህ ፡ ወርኅ ፡ በኵሉ ፡ ሌሊት ፡ እስከ ፡ ይሠርቅ ፡ ፀሓይ ፡ በቅድሜሁ ፡ ወይትረአይ ፡ ወርኅ ፡ በቅድመ ፡ ጸሐይ ። እምኀበ ፡ ይወጽእ ፡ ብርሃኑ ፡ ለወርኅ ፡ እምህየ ፡ ካዕበ ፡ የሐፅፅ ፡ እስከ ፡ ይትዌዳዕ ፡ ኵሉ ፡ ብርሃኑ ፡ ወየኀልፍ ፡ መዋዕለ ፡ ወርኅ ፡ ወይነብር ፡ ክበቡ ፡ በከ ፡ ዘእንበለ ፡ ብርሃን ። ወ፫ወርኀ ፡ ይገብር ፡ ፴መዋዕለ ፡ በዘመነ ፡ ዚአሁ ፡ ወ፫ወርኀ ፡ ይገብር ፡ በበ ፡ ፳ወ፱መዋዕል ፡ እለ ፡ ቦሙ ፡ ይገብር ፡ ታሕፃፂተ ፡ ዚአሁ ፡ በዘመን ፡ ቀዳማዊ ፡ ወበኆኅት ፡ ቀዳማዊ ፡ በመዋዕል ፡ ፻ወ፸ወ፯ ። ወበዘመነ ፡ ሙፃኡ ፡ ፫ወርኀ ፡ ያስተርኢ ፡ በበ ፡ ፴መዋዕል ፡ ወ፫ወርኀ ፡ ያስተርኢ ፡ በበ ፡ ፳ወ፱መዋዕል ። በሌሊት ፡ ያስተርኢ ፡ በበ ፡ ፳ ፡ ከመ ፡ ብእሲ ፡ ወመዓልተ ፡ ከመ ፡ ሰማይ ፡ እስመ ፡ ካልእ ፡ ምንትኒ ፡ አልባቲ ፡ ዘእንበለ ፡ ብርሃነ ፡ ዚአሃ ።