መጽሐፈ ሄኖክ 75

ወመራኅያኒሆሙ ፡ ለአርእስተ ፡ አእላፍ ፡ እለ ፡ ዲበ ፡ ኵሉ ፡ ፍጥረት ፡ ወዲበ ፡ ኵሉ ፡ ከዋክብት ፡ ወምስለ ፡ ፬እለ ፡ ይትዌሰኩ ፡ ወኢይትሌለዩ ፡ እምንባሮሙ ፡ በከመ ፡ ኵሉ ፡ ሐሳበ ፡ ዓመት ፡ ወእሉ ፡ ይትቀነዩ ፡ ፬መዋዕለ ፡ እለ ፡ እይትሐሰቡ ፡ በሐሳበ ፡ ዓመት ። ወበእንቲአሆሙ ፡ ይጌግዩ ፡ ቦሙ ፡ ሰብእ ፡ እስመ ፡ እሙንቱ ፡ ብርሃናት ፡ ይትቀነዩ ፡ በጽድቅ ፡ በምንባረ ፡ ዓለም ፡ ፩በቀዳሚ ፡ ኆኅት ፡ ወ፩በሣልስ ፡ ኆኅት ፡ ወ፩በራብዕ ፡ ኆኅት ፡ ወ፩በሳድስ ፡ ኆኅት ፡ ወይትፌጸም ፡ ጥንቃዌ ፡ ዓለም ፡ በበ ፡ ፫፻ወ፰ወ፬መንበረ ፡ ዓለም ። እስመ ፡ ለትእምርት ፡ ወለአዝማን ፡ ወለዓመታት ፡ ወለመዋዕል ፡ አርአየኒ ፡ ኡርኤል ፡ መልአክ ፡ ዘአንበሮ ፡ እግዚአ ፡ ስብሐት ፡ ዘለዓለም ፡ ዲበ ፡ ኵሎሙ ፡ ብርሃናተ ፡ ሰማይ ፡ በሰማይ ፡ ወበዓለም ፡ ከመ ፡ ይምልኩ ፡ በገጸ ፡ ሰማይ ፡ ወይትረአዩ ፡ ዲበ ፡ ምድር ፡ ወይኩኑ ፡ መራኅያነ ፡ ለመዓልት ፡ ወለሌሊት ፡ ፀሐይ ፡ ወወርኅ ፡ ወከዋክብት ፡ ወኵሉ ፡ ቅንየታት ፡ እለ ፡ የአውዱ ፡ በኵሎሙ ፡ ሰረገላተ ፡ ሰማይ ። ከመዝ ፡ ፲ወ፪ኀዋኅው ፡ ርኋተ ፡ አርአየኒ ፡ ኡርኤል ፡ በክበበ ፡ ሰረገላት ፡ ዘጸሐይ ፡ በሰማይ ፡ እለ ፡ እምኔሆሙ ፡ ይወጽኡ ፡ እገሪሃ ፡ ለጸሐይ ፡ ወእምኔሆሙ ፡ ይወጽእ ፡ ሞቅ ፡ ዲበ ፡ ምድር ፡ ሶበ ፡ ይትረኀዉ ፡ በአዝማን ፡ እለ ፡ እሙራን ፡ ቦሙ ። ወለነፋሳት ፡ ወለመንፈሰ ፡ ጠል ፡ ሶበ ፡ ይትረኀዉ ፡ በአዝማን ፡ ርኋተ ፡ በሰማያት ፡ ዲበ ፡ አጽናፍ ። ፲ወ፪ኀዋኅው ፡ ርኢኩ ፡ በሰማይ ፡ በአጽናፈ ፡ ምድር ፡ እለ ፡ እምኔሆሙ ፡ ይወጽኡ ፡ ፀሐይ ፡ ወወርኅ ፡ ወከዋክብት ፡ ወኵሉ ፡ ግብራተ ፡ ሰማይ ፡ እምነ ፡ ምሥራቅ ፡ ወእምነ ፡ ምዕራብ ። ወመሳክው ፡ ርኋት ፡ ብዙኃት ፡ እምፀጋሙ ፡ ወእምየማኑ ፡ ወአሐቲ ፡ መስኮት ፡ በዘመነ ፡ ዚአሃ ፡ ታመውቅ ፡ ሞቀ ፡ ዘከመ ፡ እልኩ ፡ ኀዋኅው ፡ እለ ፡ ይወጽኡ ፡ እምኔሆሙ ፡ ከዋክብት ፡ በከመ ፡ አዘዞሙ ፡ ወእለ ፡ ቦሙ ፡ የዐርቡ ፡ በከመ ፡ ኍልቆሙ ። ወርኢኩ ፡ ሰረገላተ ፡ በሰማይ ፡ እንዘ ፡ ይረውፁ ፡ በዓለም ፡ እመልዕልቶሙ ፡ ወእመትሕቶሙ ፡ ለእልኩ ፡ ኀዋኅው ፡ እለ ፡ ቦሙ ፡ ይትመየጡ ፡ ከዋክብት ፡ እለ ፡ ኢየዐርቡ ። ወ፩የዐብዮሙ ፡ ለኵሎሙ ፡ ወውእቱ ፡ የአውድ ፡ ለኵሉ ፡ ዓለም ።