መጽሐፈ ሄኖክ 52

ወእምድኅረ ፡ እማንቱ ፡ መዋዕል ፡ በውእቱ ፡ መካን ፡ ኀበ ፡ ርኢኩ ፡ ኵሎ ፡ ራእያተ ፡ ዘኅቡእ ፡ እስመ ፡ ተመሠጥኩ ፡ በነኰርኳረ ፡ ነፋስ ፡ ወወሰዱኒ ፡ ውስተ ፡ ዐረብ ። በህየ ፡ ርእያ ፡ አዕይንትየ ፡ ኅቡኣተ ፡ ሰማይ ፡ ኵሎ ፡ ዘይከውን ፡ ሀሎ ፡ በዲበ ፡ ምድር ፡ ደብረ ፡ ሐፂን ፤ ወደብረ ፡ ፀሪቅ ፤ ወደብረ ፡ ብሩር ፤ ወደብረ ፡ ወርቅ ፤ ወደብረ ፡ ነጠብጣብ ፤ ወደብረ ፡ ዐረር ። ወተስእልክዎ ፡ ለመልአክ ፡ ዘየሐውር ፡ ምስሌየ ፡ እንዘ ፡ እብል ፡ ምንት ፡ ውእቱ ፡ እሉ ፡ እሙንቱ ፡ እለ ፡ በኅቡዕ ፡ ርኢኩ ። ወይቤለኒ ፡ እሉ ፡ ኵሎሙ ፡ ዘርኢከ ፡ ለሥልጣነ ፡ መሲሑ ፡ እሙንቱ ፡ ይከውኑ ፡ ከመ ፡ የአዝዝ ፡ ወይትኀየል ፡ ዲበ ፡ ምድር ። ወአውሥአኒ ፡ እንዘ ፡ ይብል ፡ ውእቱ ፡ መልአከ ፡ ሰላም ፡ ጽናሕ ፡ ንስቲተ ፡ ወትሬኢ ፡ ወይትከሠት ፡ ለከ ፡ ኵሉ ፡ ዘኅቡእ ፡ ዘተከለ ፡ እግዚአ ፡ መናፍስት ። ወእሎንቱ ፡ አድባር ፡ ዘርኢከ ፡ ደብረ ፡ ሐፂን ፤ ወደብረ ፡ ፀሪቅ ፤ ወደብረ ፡ ብሩር ፤ ወደብረ ፡ ወርቅ ፤ ወደብረ ፡ ነጠብጣብ ፤ ወደብረ ፡ ዐረር ፤ እሉ ፡ ኵሎሙ ፡ ቅድሜሁ ፡ ለኅሩይ ፡ ይከውኑ ፡ ከመ ፡ መዓረ ፡ ግራ ፡ ዘቅድመ ፡ ገጸ ፡ እሳት ፡ ወከመ ፡ ማይ ፡ ዘይወርድ ፡ እምላዕሉ ፡ ዲበ ፡ እማንቱ ፡ አድባር ፡ ወይከውኑ ፡ ድኩማነ ፡ በቅድመ ፡ እገሪሁ ። ወይከውን ፡ በእማንቱ ፡ መዋዕል ፡ ኢይድኅኑ ፡ ኢበወርቅ ፡ ወኢበብሩር ፡ ወኢይክሉ ፡ ድኂነ ፡ ወጐይየ ። ወኢይከውን ፡ ሐፂን ፡ ለፀብእ ፡ ወኢልብስ ፡ ለድርዐ ፡ እንግድዓ ፡ እይበቍዕ ፡ ብርት ፡ ወኢናዕክ ፡ ኢይበቍዕ ፡ ወኢይትኌለቍ ፡ ወዐረር ፡ እይትፈቀድ ። እሉ ፡ ኵሎሙ ፡ ይትከሐዱ ፡ ወይትኀጐሉ ፡ ሀለዉ ፡ እምገጸ ፡ ምድር ፡ ሶበ ፡ ያስተርኢ ፡ ኅሩይ ፡ በቅድመ ፡ ገጹ ፡ ለአግዚአ ፡ መናፍስት ።