መጽሐፈ ሄኖክ 47

ወበውእቱ ፡ መዋዕል ፡ ዐርገት ፡ ጸሎተ ፡ ጻድቃን ፡ ወደመ ፡ ጻድቅ ፡ እምነ ፡ ምድር ፡ ቅድመ ፡ እግዚአ ፡ መናፍስት ። በእሉ ፡ መዋዕል ፡ የኀብሩ ፡ ቅዱሳን ፡ እለ ፡ ይነብሩ ፡ መልዕልተ ፡ ሰማያት ፡ በ፩ቃል ፡ ወያስተበቍዑ ፡ ወይጼልዩ ፡ ወይሴብሑ ፡ ወያአኵቱ ፡ ወይባርኩ ፡ ለስሙ ፡ ለእግዚአ ፡ መናፍስት ፡ በእንተ ፡ ደመ ፡ ጻድቃን ፡ ዘተክዕወ ፡ ወጸሎቶሙ ፡ ለጻድቃን ፡ ከመ ፡ ኢትፀራእ ፡ በቅድመ ፡ እግዚአ ፡ መናፍስት ፡ ከመ ፡ ይትገበር ፡ ሎሙ ፡ ኵነኔ ፡ ወትዕግሥት ፡ ኢይኩን ፡ ሎሙ ፡ ለዓለም ። ወበእማንቱ ፡ መዋዕል ፡ ርኢክዎ ፡ ለርእሰ ፡ መዋዕል ፡ ሶበ ፡ ነበረ ፡ በመንበረ ፡ ስብሐቲሁ ፡ ወመጻሕፍተ ፡ ሕያዋን ፡ በቅድሜሁ ፡ ተከሥቱ ፡ ወኵሉ ፡ ኀይሉ ፡ ዘመልዕልተ ፡ ሰማያት ፡ ወዐውደ ፡ ዚአሁ ፡ ይቀውሙ ፡ ቅድሜሁ ። ወልቦሙ ፡ ለቅዱሳን ፡ ትመልእ ፡ ፍሥሐ ፡ እስመ ፡ በጽሐ ፡ ኍልቋ ፡ ለጽድቅ ፡ ወጸሎቶሙ ፡ ለጻድቃን ፡ ተሰምዐ ፡ ወደሙ ፡ ለጻድቅ ፡ በቅድመ ፡ እግዚአ ፡ መናፍስት ፡ ተፈቅደ ።