መጽሐፈ ሄኖክ 45

ወዝካልእ ፡ ምሳሌ ፡ ዲበ ፡ እለ ፡ ይክህዱ ፡ ስሞ ፡ ለማኅደረ ፡ ቅዱሳን ፡ ወለእግዚአ ፡ መናፍስት ። እሰማየ ፡ የዐርጉ ፡ ወኢምድረ ፡ ይበጽሑ ፡ ከመዝ ፡ ይከውን ፡ ክፍለ ፡ ኃጥኣን ፡ እለ ፡ ይክሕዱ ፡ ስሞ ፡ ለእግዚአ ፡ መናፍስት ፡ እለ ፡ ከመዝ ፡ ይትዐቀብ ፡ ለዕለተ ፡ ሥራኅ ፡ ወምንዳቤ ። በይእቲ ፡ ዕለት ፡ ይነብር ፡ በመንበረ ፡ ስብሐት ፡ ኅሩይ ፡ ወየኀሪ ፡ ምግባሪሆሙ ፡ ወምዕራፎሙ ፡ ኍልቍ ፡ አልቦሙ ፡ ወመንፈሶሙ ፡ በማእከሎሙ ፡ ትጸንዕ ፡ ሶበ ፡ ርእይዎ ፡ ለኅሩየ ፡ ዚአየ ፡ ወለእለ ፡ ሰከዩ ፡ ስምየ ፡ ቅዱሰ ፡ ወስቡሐ ። ወበይእቲ ፡ ዕለት ፡ አነብሮ ፡ በማእከሎሙ ፡ ለኅሩየ ፡ ዚአየ ፡ ወእዌልጣ ፡ ለሰማይ ፡ ወእገብራ ፡ ለበረከት ፡ ወብርሃን ፡ ዘለዓለም ። ወእዌልጣ ፡ ለየብስ ፡ ወእገብራ ፡ ለበረከት ፡ ወለኅሩያነ ፡ ዚአየ ፡ አነብሮሙ ፡ ውስቴታ ፡ ወእለ ፡ ይገብሩ ፡ ኀጢአተ ፡ ወጌጋየ ፡ እይከይዱ ፡ ውስቴታ ። እስመ ፡ አነ ፡ ርኢክዎሙ ፡ ወአጽገብክዎሙ ፡ በሰላም ፡ ለጻድቃንየ ፡ ወአንበርክዎሙ ፡ ቅድሜየ ፡ ወቀርበት ፡ ኀቤየ ፡ ኵነኔ ፡ ለኃጥኣን ፡ ከመ ፡ ኣህጕሎሙ ፡ እምገጸ ፡ ምድር ።