መጽሐፈ ሄኖክ 27

ውእተ ፡ ጊዜ ፡ እቤ ፡ በእንተ ፡ ምንት ፡ ዛቲ ፡ ምድር ፡ ቡርክት ፡ ወኵለንታሃ ፡ ዕፀወ ፡ ምልዕት ፡ ወዛቈላ ፡ ርግምት ፡ ማእከሎሙ ። ውእተ ፡ ጊዜ ፡ አውሥአኒ ፡ ኡራኤል ፡ ፩እመላእክት ፡ ቅዱሳን ፡ ዘሀሎ ፡ ምስሌየ ፡ ወይቤለኒ ፡ ዛቈላ ፡ ርግምት ፡ ለርጉማን ፡ እስከ ፡ ለዓለም ፤ ዝየ ፡ ይትጋብኡ ፡ ኵሎሙ ፡ እለ ፡ ይብሉ ፡ በአፉሆሙ ፡ ላዕለ ፡ እግዚአብሔር ፡ ቃለ ፡ ዘኢይደሉ ፡ ወበእንተ ፡ ስብሐተ ፡ ዚአሁ ፡ ይትናገሩ ፡ ዕፁባተ ፡ ዝየ ፡ ያስተጋብእዎሙ ፡ ወዝየ ፡ ምኵናኖሙ ። ወበደኃሪ ፡ መዋዕል ፡ ይከውን ፡ ላዕሌሆሙ ፡ አርአያ ፡ ኵነኔ ፡ ዘበጽድቅ ፡ በቅድመ ፡ ጻድቃን ፡ ለዓለም ፡ ኵሎ ፡ መዋዕለ ፡ በዝየ ፡ ይባርክዎ ፡ መሀርያን ፡ ለእግዚአ ፡ ስብሐት ፡ ንጉሥ ፡ ዘለዓለም ። ወበመዋዕለ ፡ ኵነኔሆሙ ፡ ይባርክዎ ፡ በምሕረት ፡ በከመ ፡ ከፈሎሙ ። ውእተ ፡ ጊዜ ፡ አነኒ ፡ ባረክዎ ፡ ለእግዚአ ፡ ስብሐት ፡ ወነገርኩ ፡ ሎቱ ፡ ወዘከርኩ ፡ በከመ ፡ ይደሉ ፡ ለዕበዩ ።