መጽሐፈ ሄኖክ 21

ወኦድኩ ፡ እስከ ፡ መካን ፡ ኀበ ፡ አልቦ ፡ ዘይትገበር ። ወርኢኩ ፡ በህየ ፡ ግብረ ፡ ግሩመ ፡ ኢሰማየ ፡ ልዑለ ፡ ወኢምድረ ፡ ሱርርተ ፡ አላ ፡ መካነ ፡ በድው ፡ ዘድልው ፡ ወግፉም ። ወህየ ፡ ርኢኩ ፡ ፯ከዋክብተ ፡ ሰማይ ፡ እሱራን ፡ በላዕሌሁ ፡ ኅብረ ፡ ከመ ፡ አድባር ፡ ዐበይት ፡ ወከመ ፡ ዘእሳት ፡ እንዘ ፡ ይነድዱ ። ውእተ ፡ ጊዜ ፡ እቤ ፡ በእንተ ፡ አይ ፡ ኅጢአት ፡ ተአሥሩ ፡ ወበእንተ ፡ ምንት ፡ ዝየ ፡ ተገድፉ ። ወይቤለኒ ፡ ኡርኤል ፡ ፩እምነ ፡ መላእክት ፡ ቅዱሳን ፡ ዘምስሌየ ፡ ውእቱ ፡ ይመርሀኒ ፡ ወይቤ ፡ ሄኖክ ፡ በእንተ ፡ መኑ ፡ ትሴአል ፡ ወበእንተ ፡ መኑ ፡ ትጤይቅ ፡ ወትስእል ፡ ወትጽህቅ ። እሉ ፡ ውእቶሙ ፡ እምነ ፡ ከዋክብት ፡ እለ ፡ ኀለፉ ፡ ትእዛዘ ፡ እግዚአብሔር ፡ ልዑል ፡ ወተአሥሩ ፡ በዝየ ፡ እስከ ፡ ይትፌጸም ፡ ትእልፊተ ፡ ዓለም ፡ ኍልቈ ፡ መዋዕለ ፡ ኃጢአቶሙ ። ወእምህየ ፡ ሖርኩ ፡ ካልአ ፡ መካነ ፡ እምዝ ፡ ዘይጌርም ፡ ወርኢኩ ፡ ግብረ ፡ ግሩመ ፡ እሳት ፡ ዐቢይ ፡ በህየ ፡ ዘይነድድ ፡ ወያንበለብል ፡ ወመምተርት ፡ ቦቱ ፡ ወሰኑ ፡ እስከ ፡ ቀላይ ፡ ፍጹም ፡ አዕማደ ፡ እሳት ፡ ዐበይት ፡ ዘያወርድዎሙ ፡ ወኢአምጣኖ ፡ ወኢዕበዮ ፡ እክህልኩ ፡ ነጽሮ ፡ ወስእንኩ ፡ ነጽሮ ፡ ዐይኑ ። ውእተ ፡ ጊዜ ፡ እቤ ፡ እፎ ፡ ግሩም ፡ ዝንቱ ፡ መካን ፡ ወሕማም ፡ ለነጽሮ ። ውእተ ፡ ጊዜ ፡ አውሥአኒ ፡ ኡርኤል ፡ ፩እመላእክት ፡ ቅዱሳን ፡ ዘምስሌየ ፡ ሀለወ ፡ አውሥአኒ ፡ ወይቤለኒ ፡ ሄኖክ ፡ ምንት ፡ ውእቱ ፡ ፍርሃትከ ፡ ከመዝ ፡ ወድንጋፄከ ፡ በእንተዝ ፡ ግሩም ፡ መካን ፡ ወቅድመ ፡ ገጹ ፡ ለዝ ፡ ሕማም ። ወይቤለኒ ፡ ዝመካን ፡ ቤተ ፡ ሞቅሖሙ ፡ ለመላእክት ፡ ወበህየ ፡ ይትአኅዙ ፡ እስከ ፡ ለዓለም ።