መጽሐፈ ሄኖክ 100

ወበእማንቱ ፡ መዋዕል ፡ በ፩መካን ፡ አበው ፡ ምስለ ፡ ውሉዶሙ ፡ ይትጓድዑ ፡ ወአኀው ፡ ምስለ ፡ ቢጾሙ ፡ ይወድቁ ፡ በሞት ፡ እስከ ፡ ይውኅዝ ፡ ከመ ፡ ተከዚ ፡ እምደመ ፡ ዚአሆሙ ። እስመ ፡ ብእሲ ፡ ኢይከልእ ፡ እዴሁ ፡ እምውሉዱ ፡ ወእምውሉደ ፡ ውሉዱ ፡ ምሒረ ፡ ከመ ፡ ይቅትሎ ፡ ወኃጥእ ፡ ኢይከልእ ፡ እዴሁ ፡ እምነ ፡ እኁሁ ፡ ክብር ፡ እምጎሕ ፡ እስከ ፡ ተዐርብ ፡ ፀሐይ ፡ ወይትቃተሉ ። ወየሐውር ፡ ፈረስ ፡ እስከ ፡ እንግድዓሁ ፡ ውስተ ፡ ደመ ፡ ኃጥኣን ፡ ወሰረገላ ፡ እስከ ፡ መልዕልታ ፡ ትሠጠም ። ወበእማንቱ ፡ መዋዕል ፡ መላእክት ፡ ይወርዱ ፡ ውስተ ፡ ምኅባኣት ፡ ወያገብእዎሙ ፡ በ፩መካን ፡ ለኵሎሙ ፡ እለ ፡ ይረድእዋ ፡ ለኀጢአት ፡ ወይትነሣእ ፡ ልዑል ፡ በይእቲ ፡ ዕለት ፡ ከመ ፡ ይግበር ፡ ኵነኔ ፡ ዐቢየ ፡ እምኵሎሙ ፡ ኃጥኣን ። ወዐቀብተ ፡ ይሁብ ፡ ዲበ ፡ ኵሎሙ ፡ ጻድቃን ፡ ወቅዱሳን ፡ እመላእክት ፡ ቅዱሳን ፡ የዐቅብዎሙ ፡ ከመ ፡ ብንተ ፡ ዐይን ፡ እስከ ፡ ይትዌዳዕ ፡ ኵሉ ፡ እከይ ፡ ወኵሉ ፡ ኀጢአት ፡ ወእመኒ ፡ ይነውሙ ፡ ጻድቃን ፡ ንዋመ ፡ ነዋኀ ፡ ወአልቦሙ ፡ ዘይፈርሁ ። ወእሙነ ፡ ይሬእዩ ፡ ሰብእ ፡ ጠቢባን ፡ ወይሌብዉ ፡ ውሉደ ፡ ምድር ፡ ኵሎ ፡ ነገረ ፡ ዛቲ ፡ መጽሐፍ ፡ ወየአምሩ ፡ ከመ ፡ ኢይክል ፡ ብዕሎሙ ፡ አድኅኖቶሙ ፡ በሙዳቀ ፡ ኀጢአቶሙ ። አሌ ፡ ለክሙ ፡ ኃጥኣን ፡ ሶበ ፡ ታመነድብዎሙ ፡ ለጻድቃን ፡ በዕለተ ፡ ጻሕብ ፡ ኀያል ፡ ወታነድድዎሙ ፡ በእሳት ፡ ወትትፈደዩ ፡ በከመ ፡ ምግባሪክሙ ። አሌ ፡ ለክሙ ፡ ግፍቱዓነ ፡ ልብ ፡ እለ ፡ ትተግሁ ፡ ከመ ፡ ትለብውዎ ፡ ለእኩይ ፡ ወሀለወ ፡ ይርከብክሙ ፡ ፍርሀት ፡ ወአልቦ ፡ ዘይረድአክሙ ። አሌ ፡ ለክሙ ፡ ኃጥኣን ፡ እስመ ፡ ዲበ ፡ ቃለ ፡ አፉክሙ ፡ ወዲበ ፡ ተግባረ ፡ እደዊክሙ ፡ እለ ፡ ግብረ ፡ ረሳዕክሙ ፡ በዋዕየ ፡ ላህበ ፡ እሳት ፡ ትውዕዩ ። ወይእዜኒ ፡ አእምሩ ፡ ከመ ፡ መላእክት ፡ ይትኀሠሡ ፡ ምግባሪክሙ ፡ በሰማይ ፡ እምፀሐይ ፡ ወእምወርኅ ፡ ወእምከዋክብት ፡ በእንተ ፡ ኀጢአተ ፡ ዚአክሙ ፡ እስመ ፡ በዲበ ፡ ምድር ፡ ትገብሩ ፡ ኀበ ፡ ጻድቃን ፡ ኵነኔ ። ወያሰምዕ ፡ ላዕሌክሙ ፡ ኵሎ ፡ ደመና ፡ ወጊሜ ፡ ወጠለ ፡ ወዝናመ ፡ እስመ ፡ ሀለዉ ፡ ኵሎሙ ፡ ይትከልኡ ፡ እምኔክሙ ፡ ከመ ፡ ኢይረዱ ፡ ዲቤክሙ ፡ ወኢይሔልዩ ፡ ኀበ ፡ ኀጢአትክሙ ። ወይእዜኒ ፡ ሀቡ ፡ አምኃ ፡ ለዝናም ፡ ከመ ፡ ኢትትከላእ ፡ ወሪደ ፡ ዲቤክሙ ፡ ወጠል ፡ እመ ፡ ተመጠወ ፡ እምኔክሙ ፡ ወርቀ ፡ ወብሩረ ። ሶበ ፡ ይወድቅ ፡ ዲቤክሙ ፡ አስሐትያ ፡ ወሐመዳ ፡ ወቍረ ፡ ዚአሆሙ ፡ ወኵሉ ፡ ነፋሳተ ፡ ሐመዳ ፡ ወኵሉ ፡ ፃዕራተ ፡ ዚአሆሙ ፡ በእማንቱ ፡ መዋዕል ፡ ኢትክሉ ፡ ቀዊመ ፡ ቅድሜሆሙ ።