ዘእንባቆም ነቢይ 2

ወአነ ፡ እቀውም ፡ ውስተ ፡ ወዓቅብ ፡ ወአዐርግ ፡ ውስተ ፡ ኰኵሕ ፡ ወኣፀምእ ፡ ኣእምሮ ፡ ዘይነበበኒ ፡ እግዚአብሔር ፡ ወኣውሥኦ ፡ ለዘይዘልፈኒ ። ወተሰጥወኒ ፡ እግዚአብሔር ፡ ወይዜለኒ ፤ ጸሐፍ ፡ ነገረ ፡ ራአይ ፡ ውስተ ፡ ሰሌዳ ፡ ከመ ፡ ያፍጥን ፡ ዘያነብብ ። እስመ ፡ ዓዲሁ ፡ ሀለወ ፡ ራእይ ፡ በበዕድሜሁ ፡ ወይሠርቅ ፡ በማዕዶቱ ፡ ወአኮ ፡ ለከንቱ ፤ ወእመኒ ፡ ጐንደየ ፡ ጽንሖ ፡ እስከ ፡ ይመጽእ ፡ ወይበጽሕ ፡ ወኢይጐነዲ ። ወእመሰ ፡ ተመይጠ ፡ ኢትሠምር ፡ ቦቱ ፡ ነፍስየ ፤ ጻድቅሰ ፡ በአሚን ፡ የሐዩ ። ወብእሲሰ ፡ ነባቢ ፡ ወመስተሐቅር ፡ ኢየኀልፍ ፡ ወኢበምንትኒ ፤ አርሐበ ፡ ነፍሶ ፡ ሲኦል ፡ ወኢይጸግብ ፡ ከመ ፡ ሞት ፡ ወያስተጋብእ ፡ ኀቤሁ ፡ ኵሎ ፡ አሕዛበ ፡ ወይትወከፎሙ ፡ ለኵሎሙ ፡ አሕዛብ ። ዘንተ ፡ ኵሎ ፡ ይሜስሉ ፤ ላዕሌሁ ፡ ወይነግሩ ፡ ምሳሌሁ ፡ ወይብሉ ፤ አሌሎ ፡ ዘያስተጋብእ ፡ ሎቱ ፡ ዘኢኮነ ፡ ዘዚአሁ ፡ እስከ ፡ ምንትኑ ፡ ያከብድ ፡ ሎቱ ፡ ጋገ ፡ ዐቢየ ። እስመ ፡ ግብተ ፡ ይትነሣእ ፡ ወይነስኮ ፡ ወይተግሁ ፡ መማክርቲሁ ፡ ወትከውኖሙ ፡ አንተ ፡ ወየሐበልዩከ ። እስመ ፡ አንተ ፡ ሐብለይከ ፡ ብዙኀ ፡ አሕዛበ ፡ ወየሐበልዩከ ፡ ኵሎሙ ፡ እለ ፡ ተርፉ ፡ አሕዛብ ፡ በእንተ ፡ ደመ ፡ ሰብእ ፡ ወበዐመፃ ፡ አህጉር ፡ ወበሓውርት ፡ ወበእንተ ፡ ኵሎሙ ፡ እለ ፡ ይነብሩ ፡ ውስቴታ ። አሌሎ ፡ ለዘ ፡ ይትኤገል ፡ ትእግልተ ፡ እኩየ ፡ ለቤቱ ፡ ከመ ፡ ያስርር ፡ ውስተ ፡ አርያም ፡ እጐሊሁ ፡ ከመ ፡ ይፃእ ፡ እምእደ ፡ እኩያን ። ወመከረ ፡ ኀሳረ ፡ ለቤትከ ፡ ወተዐደውከ ፡ ብዙኀ ፡ አሕዛብ ፡ ወዐሙፀት ፡ ነፍስከ ። እስመ ፡ እብንኒ ፡ ትግዕር ፡ እምውስተ ፡ አረፍት ፡ ወሦክ ፡ ይወፅእ ፡ እምዕፅ ። አሌሎ ፡ ለዘ ፡ የሐንጽ ፡ አህጉረ ፡ በደም ፡ ወያጸንዕ ፡ አህጉረ ፡ በዐመፃ ። ኢኮነኬ ፡ ዝንቱ ፡ እምኀበ ፡ እግዚአብሔር ፡ ዘኵሎ ፡ ይመልክ ፡ ወኀልቁ ፡ ብዙኃን ፡ አሕዛብ ፡ በእሳት ፡ ወተመንደቡ ፡ ብዙኃን ፡ አሕዛብ ። እስመ ፡ መልአ ፡ ኵሎ ፡ አእምሮ ፡ ስብሐተ ፡ እግዚአብሔር ፡ ወይደፍኖሙ ፡ ከመ ፡ ማይ ፡ ብዙኅ ። አሌሎ ፡ ለዘ ፡ ያሰትዮ ፡ ለቢጹ ፡ በዘ ፡ ይመውት ፡ ወያስክሮ ፡ በዘ ፡ የኀስር ፡ ከመ ፡ ይነጽር ፡ ውስተ ፡ በአታተ ፡ ምሕራምሙ ። እስመ ፡ ታሰቲ ፡ ኀሳረ ፡ ለክብርከ ፡ ወርወይ ፤ ወአንተሂ ፡ ልብ ፡ ረዐድ ፡ ወአንቀልቅል ፡ እስመ ፡ ዐገተ ፡ ከመ ፡ ጽዋዕ ፡ የማኑ ፡ ለእግዚአብሔር ፡ ወተጋብአ ፡ ኀሳረ ፡ ላዕለ ፡ ክብርከ ። እስመ ፡ ርኵሰ ፡ ሊባኖስ ፡ ይደፍነከ ፡ ወሕርትምና ፡ አርዌ ፡ ገዳም ፡ ያደነግፀከ ፡ በእንተ ፡ ደመ ፡ ሰብእ ፡ ወኀጢአተ ፡ ብሔር ፡ ወአህጉር ፡ ወኵሎሙ ፡ እለ ፡ ይነብሩ ፡ ውስቴታ ። ምንተ ፡ እንከ ፡ ይበቍዕ ፡ ግልፎ ፡ ዘገለፉ ፡ ወሰበኩ ፡ ወገብሩ ፡ ሐሰተ ፡ ምትሀተ ፡ ዐይን ፡ ወይትአመኖ ፡ ገባሪሁ ፡ ለዝኩ ፡ ዘለሊሁ ፡ ገብረ ፡ ከመ ፡ ይግበር ፡ ጣዖተ ፡ በሃመ ። አሌሎ ፡ ዘይብሎ ፡ ለዕፅ ፡ ንቃህ ፡ ወተንሥእ ፤ ወይብሎ ፡ ለእብን ፤ ተለዐል ፤ ወሙእቱሂ ፡ ሐሰት ፡ ወይገብርዎ ፡ በወርቅ ፡ ወብሩር ፡ ወነፍሰ ፡ አልቦ ። ወእግዚአብሔርሰ ፡ ውስተ ፡ ጽርሐ ፡ መቅደሱ ፡ ወትፈርሆ ፡ እምቅድመ ፡ ገጹ ፡ ኵላ ፡ ምድር ።