ዘባሮክ 5

5 1 አእትቲ ፡ ኢየሩሳሌም ፡ አልባሰ ፡ ላሕኪ ፡ ወሕማምኪ ፡ ወልበሲ ፡ ትርሲተ ፡ ክብርኪ ፡ ዘእምኀበ ፡ እግዚአብሔር ፡ ለዓለም ። 2 ወተዐጸፊ ፡ ዐጽፈ ፡ ጽድቅ ፡ ዘእምኀበ ፡ እግዚአብሔር ፡ ወተቀጸሊ ፡ ቀጸላኪ ፡ ውስተ ፡ ርእስኪ ፡ ዘስብሐቲሁ ፡ ለቅዱስ ። 3 እስመ ፡ እግዚአብሔር ፡ ያርኢ ፡ ለኵሉ ፡ ዘታሕተ ፡ ሰማይ ፡ ብርሃነኪ ። 4 ወይሰመይ ፡ ስምኪ ፡ ለዓለም ፡ በኀበ ፡ እግዚአብሔር ፡ ጽድቅ ፡ ወሰላም ፡ ወክብር ፡ ወፍርሀተ ፡ እግዚአብሔር ። 5 ተንሥኢ ፡ ኢየሩሳሌም ፡ ወቁሚ ፡ መልዕልተ ፡ ወ[ነጽ]ሪ ፡ መንገለ ፡ ጽባሕ ፡ ወርእዪ ፡ ከመ ፡ ተጋብኡ ፡ ደቂቅኪ ፡ እምኀበ ፡ ምዕራበ ፡ ፀሐይ ፡ እስከነ ፡ ጽባሕ ፡ በቃሉ ፡ ለቅዱስ ፡ ወይትፌሥሑ ፡ በዝክረ ፡ እግዚአብሔር ። 6 ወፅኡ ፡ እምኀቤኪ ፡ ወወሰድዎሙ ፡ ፀሮሙ ፡ በእግሮሙ ፡ ወያመጽኦሙ ፡ እግዚአብሔር ፡ ኀቤኪ ፡ እንዘ ፡ ይጸውርዎሙ ፡ በክብር ፡ ከመ ፡ መንበረ ፡ ንጉሥ ። 7 ወአዘዘ ፡ እግዚአብሔር ፡ ይተሐት ፡ ኵሉ ፡ አድባር ፡ ነዋኃት ፡ ወይምላእ ፡ ኵሉ ፡ ማዕምቅ ፡ ወይዕሪ ፡ ምድር ፡ ከመ ፡ ይሖር ፡ እስራኤል ፡ መጽያሕተ ፡ በስብሐተ ፡ እግዚአብሔር ። 8 ወይጼልሎሙ ፡ ኵሉ ፡ ዖም ፡ ወኵሉ ፡ ዕፅ ፡ ሠናየ ፡ መዐዛ ፡ ለእስራኤል ፡ በትእዛዘ ፡ እግዚአብሔር ፡ 9 አምላከ ፡ እስራኤል ፡ በፍሥሓ ፡ ወበብርሃነ ፡ ስብሐቲሁ ፡ ወበምሕረቱ ፡ ወበጽድቁ ።