ዘሐጌ ነቢይ 1

ዘሓጌ ፡ ነቢይ ። በካልእት ፡ ዓመተ ፡ መንግሥቱ ፡ ለዳርዮስ ፡ ንጉሥ ፡ በሳድስ ፡ ወርኅ ፡ አመ ፡ ሠርቅ ፡ ኮነ ፡ ቃለ ፡ እግዚአብሔር ፡ ዘእደ ፡ ሐጌ ፡ ነቢይ ፡ ወይቤሎ ፤ በሎ ፡ ለዝሩባቤል ፡ ወልደ ፡ ሰላትየል ፡ ዘሕዝበ ፡ ይሁዳ ፡ ወለዮሴዕ ፡ ወልደ ፡ ዮሴዴቅ ፡ ካህን ፡ ዐቢይ ፡ ወበሎሙ ። ከመ ፡ ዝይቤ ፡ እግዚአብሔር ፡ ዘኵሎ ፡ ይመልክ ፤ ዝንቱ ፡ ሕዝብ ፡ ይብሉ ፤ ኢኮነ ፡ ጊዜሁ ፡ ለሐኒጸ ፡ ቤተ ፡ እግዚአብሔር ። ወኮነ ፡ ቃለ ፡ እግዚአብሔር ፡ በእደ ፡ ሐጌ ፡ ነቢይ ፡ ወይቤሎ ። እምጊዜሁ ፡ ለክሙ ፡ ከመ ፡ ትንበሩ ፡ ውስተ ፡ ልገታተ ፡ ቈላት ፡ ወዝኒ ፡ ቤት ፡ ይመዘብር ። ወይእዜኒ ፡ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ሐልይዎ ፡ እስኩ ፡ በልብክሙ ፡ ፍናዊክሙ ። እስመ ፡ ዘራእክሙ ፡ ብዙኀ ፡ ወታአትዉ ፡ ኅዳጠ ፤ ትበልዑ ፡ ወኢትጸግቡ ፡ ትሰትዩ ፡ ወኢትረውዩ ፡ ትትከደኑ ፡ ወኢትመውቁ ፤ ወዘሂ ፡ ያስተጋብእ ፡ ዐስቦ ፡ አስተጋብአ ፡ ውስተ ፡ ዕቊር ፡ ስቁር ። ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ ሐልዩአ ፡ ፍናዊክሙ ። ወዕረጉ ፡ ደብረ ፡ ወግዝሙ ፡ ዕፀወ ፡ ወሕንጹ ፡ ቤተ ፡ ወአሥምሩ ፡ ወሰብሑ ፤ ይቤ ፡ እግዚአብሔር ። ርኢክሙ ፡ ብዙኀ ፡ ወኮነ ፡ ኅዳጠ ፡ ወአባእክሙ ፡ ቤተ ፡ ወነፋሕክዎ ፤ በእንተ ፡ ዝንቱ ፡ ከመዝ ፡ ይቤ ፡ እግዚአብሔር ፡ ዘኵሎ ፡ ይመልክ ፤ እስመ ፡ ቤትየ ፡ መዝበረ ፡ ወአንትሙሰ ፡ ትጼንዑ ፡ አብያቲክሙ ፡ ኵልክሙ ። በእንተ ፡ ዝንቱ ፡ ታቀውም ፡ ዝናመ ፡ ሰማይ ፡ እምላዕሉ ፡ ወምድርኒ ፡ ኢትሁብ ፡ ፍሬሃ ። ወኣመጽእ ፡ ኲናተ ፡ ላዕለ ፡ በሓውርት ፡ ወላዕለ ፡ እክል ፡ ወወይን ፡ ወቅብእ ፡ ወላዕለ ፡ ኵሉ ፡ ዘትፈሪ ፡ ምድር ፡ ወላዕለ ፡ ሰብእ ፡ ወእንስሳ ፡ ወላዕለ ፡ ኵሉ ፡ ተግበረ ፡ እደዊሆሙ ። ወሰምዐ ፡ ዝርባቤል ፡ ወልደ ፡ ሰላቲየል ፡ ዘሕዝበ ፡ ይሁዳ ፡ ወዮሴዕ ፡ ወልደ ፡ ዮሴዴቅ ፡ ካህን ፡ ዐቢይ ፡ ወኵሎሙ ፡ ሕዝብ ፡ እለ ፡ ተርፉ ፡ ቃለ ፡ እግዚአብሔር ፡ አምላኮሙ ፡ ወቃለ ፡ ሐጌ ፡ ነቢይ ፡ ዘከመ ፡ ለአኮ ፡ እግዚአብሔር ፡ አምላክሙ ፡ ኀቤሆሙ ፤ ወፈርሁ ፡ ሕዝብ ፡ እምቅድመ ፡ ገጹ ፡ ለእግዚአብሔር ። ወይቤ ፡ ሐጌ ፡ መልአከ ፡ እግዚአብሔር ፡ ለሕዝብ ፤ አነ ፡ ምስሌክሙ ፤ ይቤ ፡ እግዚአብሔር ። ወአንሥአ ፡ እግዚአብሔር ፡ መንፈስ ፡ ዝርባቤል ፡ ወልደ ፡ ሰላቲየል ፡ ዘሕዝበ ፡ ይሁዳ ፡ ወመንፈስ ፡ ዮሴዕ ፡ ወልደ ፡ ዮሴዴቅ ፡ ካህን ፡ ዐቢይ ፡ ወመንፈሶሙ ፡ ለኵሎሙ ፡ እለ ፡ ተርፉ ፡ ሕዝብ ፤ ወቦኡ ፡ ይግበሩ ፡ ግብረ ፡ ቤተ ፡ እግዚአብሔር ፡ አምላኮሙ ፡ ዘኵሎ ፡ ይመልክ ።